पुणे : चित्रपटांतील गाणी, कविता शास्त्रीय नृत्यातून मांडत प्रसिद्ध नृत्यांगना शर्वरी जमेनीस यांनी कथ्थक नृत्यातून चित्रपटसृष्टीचे प्रतिबिंब उलगडले. गणेश वंदना, कृष्णलीला, दुर्गेचे रूप यांच्या बहारदार सादरीकरणाने शर्वरी आणि त्यांच्या सहकार्यांनी ‘वन्स मोअर’ आणि टाळ्यांचा कडकडाटात दाद मिळवली.
विद्यार्थी सहायक समितीचे संस्थापक प्रसिद्ध गणिततज्ञ डॉ. अच्युत शंकर आपटे यांच्या जन्मशताब्दीनिमित्त स्वारगेटजवळील गणेश कला क्रीडा रंगमंच येथे ‘फुट प्रिंट्स’ या विशेष कार्यक्रमाचे आयोजन करण्यात होते. संस्थेचे देणगीदार, हितचिंतक, आजी-माजी विद्यार्थी व कर्मचारी यांच्यासाठी हा कार्यक्रम आयोजित केला होता. ‘मुघल-ए-आझम’मधील मुजर्याने कार्यक्रमाची सांगता झाली. निवेदन मधुराणी प्रभुलकर यांनी केले. या प्रसंगी समितीच्या कार्यावर आधारित ‘आधारवड’ या लघुपटाचे प्रकाशन करण्यात आले.
या वेळी माहिती देताना कार्यकारी विश्वस्त तुकाराम गायकवाड म्हणाले, ‘ग्रामीण भागातील गरजू विद्यार्थ्यांना शहरात शिक्षण घेता यावे, यासाठी त्यांना मदत करण्याच्या उद्देशाने डॉ. आपटे यांनी विद्यार्थी सहायक समितीची १९५५ मध्ये स्थापना केली. तीन विद्यार्थ्यांपासून सुरू झालेले समितीचे कार्य आता विस्तारले असून, शहरात पाच वसतिगृहांतून सुमारे ७७५ विद्यार्थी-विद्यार्थिनी शिक्षण घेत आहे.’
‘आपटे यांचे जन्मशताब्दी वर्ष आठ नोव्हेंबर २०१८ रोजी सुरू झाले आहे. समितीच्या माध्यमातून केवळ वसतिगृह चालविले जात नाही, तर विद्यार्थ्यांमध्ये आत्मविश्वास निर्माण करून स्वावलंबनाचे धडे देत चारित्र्यवान पिढी निर्माण करण्यात येते. समितीची वसतिगृहे म्हणजे परिवर्तनाची आणि व्यक्तिमत्व विकासाची केंद्रे आहेत. नवीन वसतिगृहासह कौशल्य विकास प्रशिक्षण, कार्यशाळा, अभ्यासिका, तज्ज्ञांचे मार्गदर्शन आदी उपक्रम वर्षभर राबविण्यात येणार आहेत,’ अशी माहिती गायकवाड यांनी दिली.